முகாம் நோக்கி...

விரைவில் மீண்டும்
எங்கள் பாதங்கள் படைதிரளும்
அகதி முகாம்களை நோக்கி.

ஆயத்தமாகின்றதே
ஆயுததாரிகளின் அணிவகுப்பும்
வீதியோர நடைபவனியும்
ஆகாய விமானங்களின் ஆட்சேர்ப்பும்.

தவிர

குட்டி வெடிக்கும் இனத்துரோகம்
குண்டு வெடிக்கும் சாதனைகள்.

சத்தியம் தவறிய சாதுமோதல்.
ஊனப்பட்டுக் கிடப்பில்
சத்தம் இல்லாது
விழுந்த சமாதான முயற்சி.

நலனற்ற விமர்சனம்
வேண்டாதோர் தேடிய
விரும்பாத உறவு.

இன்னும் அதிகரிக்கலாம்.

எங்களை நோக்கிய
ஆயுதமுனைகள்.
ஊர் நோக்கித் திரும்பும்
பீரங்கிகளின் தளக்கோணம்.

தமிழ் இனத்தை தின்று பழகியவர்கள்
மீண்டும்
இருக்கைகளை நிரப்பியதால்...

மற்றொரு முறை
வெகுவிரைவில்
எங்கள் பாதங்கள்
யாத்திரை செல்லும் போல
முகாம்களை நோக்கி.