வெருளிகளோடான வாழ்வில்

வேட்டை மிருகங்களுக்கு
இப்போது வேறென்ன வேலை.

இழுத்துப் பிய்த்து... சப்பித்துப்பி
நன்றாக கோலோச்சி
வேட்டையாட முடிகிறது.

பாவம் சனங்கள்...

எலும்பையும் கொஞ்சம் சதையையும்
வைத்துக்கொண்டு
எத்தனைக்கென்று பகிர்வது.

எல்லா முகங்களும் வெறிபிடித்தே திரிவதால்
மிரண்டு வெருண்டோடி
எங்கென்று வாழ்வது.

எதிர்த்து குரலெழுப்ப
முக்குகின்ற முனகுகின்ற காவல் வெருளிகளோடு
எவ்வாறு பலம் பெறுவது.

வாய்பொத்தும் கைகளும்
தீ மூச்சுவிடும் சுடுகுழல் முனைகளும்
சுதந்திரமாக நீள்கையில்

பாவம் சனங்கள்.

எலும்பையும் கொஞ்சம் சதையையும்
வைத்துக்கொண்டு.