நிலவுசுட்ட நாட்கள்

உன் கொஞ்சல்
மொழிகளுக்காய் கொஞ்சக்காலம்
நான் கெஞ்சித்
திரிந்த அந்த நஞ்சு நாட்கள்

கொட்டக் கொட்ட
விழித்து உறக்கம் விரட்டி
பக்கம் பக்கமாய்க் கவிதைகளைக்
கொட்டிக் கிறுக்கிய
சில கொள்கையுள்ள நாட்கள்

யாருக்கும் தெரியாமல்
என் இரகசியப் பெட்டகத்தில்
நீ ரசித்தவை
எல்லாம் சேமித்த
சில செல்லாத நாட்கள்

ஊருக்கு வெளியே
உன்னைக் காண்கையில்
உள்ளத்தின் உண்மைகளை
உரக்கக் கத்தி
உன்னிடம் உளரத் தோன்றிய
அடடா!
அந்த உத்தமமான நாட்கள்

என் காதல் வேருக்கு
நானே...
நீர் ஊற்றிக் கொண்டிருக்கையில்

உன் பெயருக்குப் பின்னும்
நெற்றிக்கு மேலும்
எவனோ இடம்பிடிக்க
கன்னத்தைக் கண்ணீரும்
நெஞ்சை உன் நினைவுகளுமாக

எரிமலைக்குழம்பாக
குமுறி சுட்டுப்போன
அன்றைய சூடான நாட்கள்
நினைவுகள்
சுடும் நாட்கள் மட்டுமல்ல

அவைதான் எனக்கு
நிலவுசுட்ட நாட்கள் கூட