அவளைப்போல

அங்கே அலைகளுக்குப் போட்டியாக
தம் பாதப்பதிவுகளை
பாதுகாக்கத் துடிக்கும்
ஆயிரம் சோடிக் காதலர்கள்

என் கன்னத்துத்
தாடிக்குத்
தலை சீவிக்கொண்டது
ஞாபகச்சீப்பு

நான் சட்டைப்பொத்தான்களை
பூட்டத்தொடங்கியதும்
என் முகத்தைச் சவரக் கத்திக்கு
அறிமுகப்படுத்தியதும்
அவள் எனக்கு அறிமுகமான
பிறகுதான்

என் கண்ணைப்
பார்த்துக்கொண்டே
அவள் பொட்டுவைப்பதும்
அவள் கன்னத்தைப்
பார்த்து நான்
தலைசீவிக்கொண்டதும் அப்போது

நான் ‘அலைகள் ஓய்வதில்லை’
பார்த்தது முதலாய்
அவளில் காதல்கொண்டவன்

அவள் ‘அலை பாயுதே’
பார்த்ததும்
என்காதலை வெறுத்தவள்

ஆற்றுப்படுகையாக
எங்கள் மனக்கலப்பும் ஆவியுயிர்பாய்
மனக்கலைப்பும் எங்களில் முடிந்தது

இந்த கொஞ்சநாட்களாய் தான்
கடற்கரை ஓர காலடிபோல்
என் காதல்ஞாபங்கள்
மெதுவாய் கரைந்து கொண்டிருக்க

அதற்குள்...

மீண்டும் அலைகளுக்கு போட்டியாக
ஆயிரம் காதலர்கள் அங்கே
இங்கு என்னைப்பார்த்து
ஒரு அலைநண்டு சிரிக்கிறது
நுரைக்குள் ஒளிந்துகொண்டு

அவளைப்போல...